وحدة المعنى

أنا شاعر في قلبـي الكون بذرة مكنونــة

تطرح قصايد عجب وحكاوي مجنونــة

تحت الخفايا قصـور تبني جبال وتهــــد

وتهذي فيا بوجـــع، والوحدة.. مضمونة

مجرد احساس

حاسس كأن الكلام شايل في قلبه كلام

حاسس كأن الوتر شايـل في ألمه آلام

متصور الدنيا جــــــوة الدنيا مسكونة

وحاسس كأن  اليــــــوم في عدته أيام

رباعية مصر

قلب الوطن معصور ع الأرض دم شهيـــــــد

عقل الوطن شايط والصرخــــــــــة آه يا عبيد

تمن الكرامة يا مصـــــــــــــر يا حرة يستاهل

بس الوجع في حضـــــــــــن الرصاصة شديد

قلب الوطن ثورة زي النــــــــــــــــــار تتجدد

زادها صدور الولاد لما الطلقـــــــــــــة تتسدد

لكن اللي قلبه برئ يا مصـــــــــر ما يموتشي

ده الحق هو الباقــــــــــــــــــــي والظلم متبدد

تسقط جيوش العفن والشـــــــــــــر والخاينين

وتعيش عيونك يا مصر ولــــــــو فداهـم مين

حبك عبادة عشــــق.. زي الصــــــلاة والذكر

مهرك ثبات أو دم.. حبك عقيــــــــــــدة ودين 

 

يسقط غباء البــــــــــارود والطوبة والكرباج

تسقط شريعة هولاكو وابو جهـــــل والحجاج

يسقط جدار الرعب والسجن ........ والسجان

وتعيشي إنتي يا مصر.. نجمـــة على الأبراج

 

فاتني أقوللك يا مصر إن العتمة مش قدرك

ده انتي اللي بادءة النور والثورة من عندك

والكل يمشي وراكي حتـــــى ان بان سابق

مين اللي يسبق خطاكي وانتي مافيش قبلك؟

القدر الاختياري

يـاللي حاير دي المصاير للرجال بالاختيار

حد حقه يموت شهيد.. حد شوقه يعيش حمار

حد يصنع م الهزيمة جمرة النصــــر القريب

حد يختار الهـــــــــــــــوان ويبدله بالانتصار

حسبة برمة

قلت إيه؟؟ لا بسيطة.. سهـــــل مـــوت أحلهالك

المراد التاني أبدى مــن حلولــــــــي في مجالك

والتساور في المصايـــر آخره لــــو يفلح يومين

واللي كذبـه كان أمــان.. صدقــه أوردنا المهالك

العلة

الحكاية من البدايـــــــة للنهاية في ازدواج

فرد تاني للمؤانسة فــــــــرد أول لاحتياج

والمثنى لولا كان لولا شاف الهادي نوره

لجل هذا قاله كمــــــل نص دينك بالزواج