المعاد

الورد كله جميل مع انه من نبت طين

زي البشر ألوان تفرق فـي ذات البين

بس الأصل غالــب لا بد للطين يعود

والبعث رفض الأرض لعـودة الاتنين

لأ

من نبرتين دار العـــدم زي الرحـــــم للخلق

كاف ابتدا ونــــون تمام نطقها صوت الحق

كان الوجود م  الانتشار للاحتضــــار عنده

وكان شيطان الكفــــــر جاهز يقول لربه لأ

القلب الشجاع

شوف الجلال لمـا الولد يقتــــــل خيال الخوف

يهدم صنم ويزيل وتد ويحيل ظروف لظروف

أما الجبـــــان فهجمته دفعــــــــــــة بإيد الجبن 

وآدي اللي يفرز ولـــــــد ما بين أسد وخروف

تغيير

حاجات كتير بالهبـــــــــــــــل اتغيرت فيا

نظري قصـر، دمي تقــــل وخلقي داق بيا

قلبي خلاص بقــــــــــــا أسود مـن الفحمة

واللي يقف ضدي هالك مالــــــــــوش دية

والوحدة

الغربة في وحدتي عايــــش بعيد عنك

الإسم عايش صحيح لكـــــن بعيد عنك

ميت أسير الصمت والبــــرد والضلمة

عايش في ودني صداك داير يعيد عنك

والشوق

مذهول في حضرة غيابك كأني مش عارفك

والشوق كأنه حبــــــــــل رابطنـــي بشفايفك

يتشد من ناحيتك أتشـــــــــــد دوغري إليكي

ألاقيني من لهفتي شايفـــــــــك ومش شايفك

فذلكة إيمانية

الكفر آية إيمان الكــــــــــافر المــــــــرتد

شاف الحقيقة عيان ولمسها جـــــــد الجـد 

إن كان يمـوت كفران برضه مات عارف

شايف لكنــه عنيد والكفــــــــر ورث العند

توازي الأسى

مين اللي قاللك يا بكرة تيجي مستعجل

إيه اللي جابك ويومنــا لســة ما اتسهل

وزع علينا الحزن بالعـــــدل ما ظلمنا

ميزان توازي الأسى بكفـــة ما تمَيـٍــل

سؤال بلا قافية

هب إن حلمــك تحقق فــــي التو واللحظة

جالك فريـش وطبيعي بدون مواد حافظة

تنجز كأنـــــــه حلال اصطدته ع الطاير

ولا تحاسب وتهـــــــــدا وتبوظ اللحظة؟

لحظة صمت

عاشقك يا ست البشر بس الكـــلام عاجز

أنا اللي خلى الكلام فــــي حجره يتجاوز

واقف في حجرك كسير لا حول لا حيلة

صامت كأني بليـــــــــــد محدود الغرايز

بكـــــرة وبعده

فاكر ليالي زمان لما التــــــاريخ كان حي؟

أنا من ساعتها بافكر في بكرة ده اللي جاي

وبكـرة صبح النهاردة ويومنا صار ماضي

وانا كأنــي في مكاني في الحلــم رايح جاي

غزل غير عفيف

يا بنت يـا ام الرمـــــــوش تفرش على فدان

عودك سليم م العطــب لا سوسة ولا انسان

وجهك برئ م العـوج والنعمــــة في سكونه

صدرك جناين الربيــع والحكمة في الرمان

السهل والصعب

أصعـــب من الصعـــــب راجل يقول الآه

ويزيد عليه الوجع تهــــــــون عليه الحياه

وأسهل من السهل شيله للجبــال بالكـــــف

ما دام صعيب الهوان الصعـــب هان وياه

المعجزة

كأني باصص لتحت شايف جميع الكون 

كاشف صفات العجب بألف شكــل ولون 

ورؤيتي في الذات تبلع عصـــــا موسى 

أركــع تقول انجذب أسجد تقــول مجنون

الصبـــــــر

عمر اللي راح ما يعود طبع القضا والجبر

إن اللي فـــات مدفون في الابتلاء والأمر

تصبر تلاقي اللي ضـــــــاع بيتخلق تاني

أجمل ما كان من زمان بس المراد الصبر

صمــــــود

أجمل فصــول الأمل نعيشها لو نفشل

طول مـا الزمن معووج الحلم مستقبل

نيأس في عز النجــــاح كأننا هانموت

وتحت ضرب الجــــزم دايما بنستقتل

اختـــــــلاط

زي القمر ما يكــــون بالليل مصاحبني

زي الخيال فـــــي الصبح دايما بيسلبني

إنتي الي طيفك ملازم الصبح والعتمة

وإنتي اللي فصل الوجود عنك بيغلبني

المصـــــــــير

تحت المطر والريح أضعــف مـن القشة

مخلوع عن الاصل نابت جــــــذور هشة

ماشي على الحيط كبرص أو صــرصار

أهون مصيرة هبــــــــــــــــــــــة بمقشـة

بيان تأسيسي

الكلام من أولـــــــــــــه ان اللي فــــــــــات بايت

وإن المقال ممجـــــــــــــوج كما نــدب ع الفايت 

وإن الكريــــم منتحي في الستــــــــــر على جنبه

واللي بـــــــــدأ م اليــــــــــوم خلا التاريخ باهت